Hitt og þetta

Banka - kreppa...

2008-10-15T13:30:00.001Z

Gamla fólkið á elliheimili úti á landi var orðið afar þrúgað og meðtekið af efnahagsbölsýnis-síbyljunni í fjölmiðlunum.
Forstöðukonan hafði sverar áhyggjur af þessu.
Í morgun var leikfimi á heimilinu. Forstöðukonan bað íþróttafræðinginn að vera nú heldur á léttu nótunum og fyrir alla muni ekki minnast á efnahagsmál eða þrengingar.
Þetta væri alveg að fara með gamla fólkið.
Íþróttafræðingurinn sagði það ekki nema sjálfsagt.
Svona hóf hann tímann:
"Kæru vinir! Í dag byrjum við á mjög léttri æfingu. Við réttum hendur út frá hliðunum, beygjum olnbogana og bönkum flötum lófum létt á bringuna, síðan réttum við úr höndunum og kreppum snöggt hnefana og endurtökum allt aftur og aftur," og svo hrópaði hann:
"Koma svo! Banka - kreppa, banka - kreppa, banka - kreppa......!"

ps. tileinkað Júlla

Komin heim frá Finnlandi

2008-09-23T00:21:00.006Z

Þá er maður víst kominn heim frá Finnlandi, þetta var ágætis túr. Hvað ég var að flækjast þar? Þetta var norrænt almanna-trygginganámskeið, en þau eru haldin með reglubundnu millibili. Nokkrar myndir úr túrnum er að finna á Facebook. Stoppaði stutta stund í Køben á leiðinni heim og hitti Jón Arnar, Ingunni og Eirík og að sjálfssögðu nýjasta frændan hann Viktor Bjarkar.

Nú er félagsmála törnin að byrja á fullu og var ég við stjórnarskipti hjá Kiwanisklúbbnum Elliða var það hin notalegasta stund.

Héðan úr sveitinni er allt gott af okkur að frétta. Næstu helgar verða undirlagðar af námskeiðum í bogfimi en ég er að kenna þar ásamt félaga mínum honum Inga Bjarnar. Fullbókað er á námskeið fram í nóvember. Sem sagt alveg nóg að gera og engin þörf á að kvarta yfir aðgerðarleysi.

Heimurinn ekki farinn til fjandans ennþá ??

2008-09-12T15:25:00.009Z

Er heimurinn að farast ef þið vitið það ekki þá er svarið hér. Það er greinilegt að sumir hafa húmorinn í lagi.

Það hefur orðið mikið grín á vefnum í kringum þessa tilraun CERN

Annars er ég að skreppa til Finnlands núna á sunnudaginn og verð fram á fimmtudag.

Ekki að verða vitlaus

2008-06-16T23:55:00.000Z

Stundum líður manni svona eins og í þessum gamla gullmola. Datt niður á þetta við að lesa allar "bansafréttirnar" frá því í dag. Það eru bara birnir á ferð hálfsmánaðarega. Ég hafði ekki heyrt fréttir fyrr en síðdegis í dag og hélt ég væri orðin vitlaus. Annar björn á ferðinni!?!

Annars er allt gott að frétta af okkur, ekkert sérstakt að gerast. Jú annars hvaða vitleysa ég hef verið upptekin undanfarna fjóra daga með góðum vinum frá Dannenberg í Þýskalandi H. Ganswindt og frú, en þau millilentu hér á leið sinni til Kanada.

Félagsmálafrík

2008-05-14T23:19:00.002Z

Það má nú ekki spyrjast að maður hætti alveg að skrifa hérna. En það er kominn tími til.

Ég var að halda aðalfund í klúbbnum okkar hér í sveitinni og nú er bara eftir að fara á þing Kiwanis norður á Krók um næstu mánaðarmót. Eftir það getum við farið að slappa af. OMG hvað ég verð feginn. Það er nú ekki þar með sagt að ég sé endanlega laus þó að starfsárinu sé að ljúka. Tveir fundir eru eftir í haust og eftir það tekur við nýtt embætti sem greint verður frá seinna. Ég er víst einn af þessum mönnum sem kann ekki að segja nei.

Ein af systrum mínum segir að ég sé "ofvirkur í félagsmálum". Gott að vera ofvirkur í einhverju ;)

Langaði ekkert að koma heim

2008-04-03T21:59:00.007Z

Jæja þá er maður kominn heim frá Færeyjum. Þetta var fín ferð alltaf gaman að koma til Færeyja.

Ferðin hófst föstudaginn 28. mars sl. er við flugum til Vága og lentum þar um kl. 15:00 og var farið beina leið til Tórshavn en áætur Kiwanisfélagi Sámal Bláhamar sá um að flytja hópinn sem var um 40 manns allt í allt. Dagin eftir var svo haldið á svæðisráðsfund en það var tilgangur ferðarinnar. Þess má geta að ég var fundarritari og hafði nóg að gera. Á sunnudeginum var farið í ferð til Sandeyjar og heimsóttum við bæinn Skálavík. Tilgangur þessarar ferðar var að afhenda styrk frá Styrktarsjóði Kiwanis en hann rann til barnaheimilisins Leikan í Skálavík. Eins og kunnugt er varð mikið tjón í miklu óveðri í febrúarbyrjun í Færeyjum og varð Skálavík verst úti. Styrkum við Leikan um eina milljón króna. Það var virkilega gaman að koma þarna. Skálavíkingar minntust með miklu þakklæti á þann stuðning sem þeir hafa fengið frá Íslandi. Í bakaleiðinni var komið við í Kirkjubæ en þangað hafði ég aldrei komið og var það virkilega gaman. Dvöldum við þar drjúga stund við að skoða staðinn.

Nú var komið að seinasta deginum en þá fór hópurinn í ferð á Eysturøy en ég og tveir aðrir nenntum ekki með. Hafði farið þetta áður árið 2005. Eyddum við morginum í göngutúr um Þórhöfn og sáum ekki eftir því. Fórum um eittleitið út á flugvöll en við áttum að fjúga heim kl. 16:30. Vélin fór á áæltun en eftir u.þ.b. 20 mínútna flug var snúið við aftur vegna bilunar. Máttum við bíða til kl. 19:00 og vorum ekki lentir í Reykjavík fyrr en um 20:30. Sem sagt fór tvisvar til Færeyja í sama túrnum.

Myndir úr túrnum er hægt að sjá hér.

Mót, námskeið og fleira

2008-03-06T16:26:00.005Z

Það er nú orðið nokkuð síðan ég skrifaði hér síðast, en undanfarnar vikur hefur verið mikið að gera. Um síðustu helgi var ég t.d. mótstjóri á svokölluðu Internetmóti ÍFR og MTV Dannenberg og er þetta í fjórða skipti sem það fer fram. Mótið fer þannig fram að paraðir eru saman þátttakendur einn frá ÍFR og einn frá MTV og þeir keppa innbyrðis. Alls tóku 34 þátt að þessu sinni 17 frá hvoru félagi. Þegar keppni líkur þá eru úrslit send strax til mótherjans og við móttókum úrslit þeirra og röðuðum saman. Niðurstöðu má sjá á síðunni sem ég vísaði til hér áður.
Ég hef nú ekki lagt það í vana minn að fjalla hér um vinnuna, en hef staðið í ströngu í dag í að aðstoða og vera með fyrirlestur á námskeiði, sem haldið var fyrir umboðsmenn TR og má segja að allur vindur sé úr manni eftir svona dag.
Um næstu mánaðarmót verður skroppið til Færeyja eina helgi á vegum Kiwanis og er mann strax farið að hlakka til.

Pólitík er bara fyrir hunda

2008-01-25T01:09:00.000Z

Eftir lætin í borgarpólitíkinni síðustu daga er ég nú bara feginn að hafa flutt úr Reykjavík. Þvílík hringavitleysa sem þetta er búið að vera. Fyrir mörgum árum heyrði ég haft eftir þjóðþekktum manni að "pólitík væri bara fyrir hunda" og má hver og einn skilja það eins og hann vill. Mér hefur alltaf fundist þessi setning yndislega tvíræð. Hvort þetta var svo haft eftir honum er annað mál en mér var alla vega sagt það.

Hvað er að þegar ekkert er að og allt er í lagi

2008-01-18T01:04:00.000Z

Hvað í andsk… á maður að gera þegar allt er í lagi og ekkert er að.

Mér datt bara si svona í hug að vitna í orð pabba gamla en hann sagði þetta stundum. Það duttu stundum út úr honum ýmis gullkorn. Fjandakornið ég hafði samt viljað hafa yfirlit yfir þær vísur sem honum datt í hug. Hann gerði allt of lítið af þessu eða hélt því leyndu. Það má til sanns vegar færa að hann talaði ekki mikið um sjálfan sig. Jeppinn hanns verður mér alltaf minnstæður en hann var kominn vel til ára sinna þegar ég man fyrst eftir jeppanum.

Pabbi gamli var kanski ekki þessi dæmigerði jeppadellukall, sem við gerum okkur hugarlund í dag. Hann var samt ásamt félögum sínum var einn af þeim fyrstu sem fór t.d. í Landmannalaugar á jeppa held að hann og félagar hafi verið númer 2 í röðinni í því að komast þangað.

Ég var á fundi um daginn í Kiwanisklúbbum Geysi og þar var maður nokkur (fyrirlesari á fundinum), sem var að fjalla um jeppamennsku nútímans. Þá greindi ég honum frá þessari ferð foreldra minna og félaga þeirra. Hann varð allur uppveðraður og vildi endilega fá greinagóða frásögn af þessari ferð. Ég held að mamma sé orðin ein til frásagnar.

Þetta fóru þau á Willys árgerð 1942 og geri menn betur í dag. Þetta er efni sem ég þarf að spyrja mömmu betur út í einhverntíma þegar okkur gefst tími til.

Ég held að þessi vísa eftir pabba hafi orðið til í Landmannalaugaferðinni sem farin var ´47 eða ´48.

Hóf sig í brekkur býsna snar

brúnum að lokum náði,

hjeppinn og kaldar kvíslarnar

klauf og í Laugum áði.

Hjeppinn=jeppinn gert til að stuðla rétt

Félagarnir voru

Eðvarð Sigurðsson, Helgi Hóseasson og Halldór Jakobsson.

ps. Helgi var prentari og er ekki sá sami og alþjóð veit af. Sá er húsasmiður eins og einn af "Himnafeðgunum".

Ég vona að frekjurnar af Litlu-Brekku slektinu móðgist ekki þó að ég birti þetta.

Erfitt að byrja rútínuna

2008-01-09T23:17:00.000Z

Var með fund í Geysi í kvöld. Það er alveg makalaust hvað það er alltaf erfitt að byrja aftur eftir áramót. Annars var þetta nokkuð góður fundur og fyrirlesarinn sem fjallaði um fjalla og jeppamennsku var alveg ágætur. Ég virðist ekki ætla að losna við þennan flensuskratta. Ég á að mæta hjá lækni á föstudag og vonandi kemur eitthvað út því. Svo er það bara vinnan á morgun, setja sig í gírinn og góða skapið. Bjargar því að það er orðið stutt í helgina.

Þrettándinn

2008-01-06T22:40:00.000Z

Þetta er búinn að vera notalegur þrettándi. Dagurinn var tekin í afslöppun. Þrettándabrennan hér í bænum er alltaf jafn glæsileg og flugeldasýning Kyndils var hreint stórkostleg. Magga systir og manna kíktu hér við hjá okkur og komu með á brennuna. Sigga fór að brennu lokinni í þrettándaveislu hér í bænum en mamma og Magga komu með mér heim þar sem ég bauð uppá vöflur og kaffi.

Áttræðis afmæli

2008-01-05T12:57:00.000Z

Hann "tengdapabbi" Geir Guðlaugur Jónsson hefði orðið 80 ára í dag hefði hann lifað. Ég og Sigga, ásamt tengdó og Dolla, ætlum að halda uppá þetta í kvöld með því að fara út að borða.

Reyndar kynntist ég honum aldrei sá hann þó tvívegis. Þetta var töluvert áður en ég kynntist Siggu.

Afmælisveislan heppnaðist mjög vel, en við vorum á Madonna við Rauðarárstíg, mæli með matnum þar.

Ligg í flensu

2008-01-03T15:46:00.000Z

Það byrjar ekki vel hjá manni nýja árið, lagðist og ligg enn í flensu síðan á laugardag 30. des. Áramótin fóru fyrir lítið. Vonandi fer þetta nú að rjátlast af manni hvað úr hverju.

ps. gat ekki annað en glott áðan er ég sá fréttina um að Moggabloggið hefði orðið fyrir árás. Voru einhverjir fleiri en ég búnir að fá nóg af bullinu þar? Segi nú bara svona en svona árásir eins og blog.is var fyrir eru ekkert grín.

Þar sem bullið veður uppi

2007-12-30T15:26:00.000Z

Datt svona í hug þegar ég sat hér í mestu makindum og var að skoða Moggabloggið að þetta væri nú meira bullið sem þar væri vaðandi uppi oft á tíðum. Eftir að hafa lesið sumt af þeirri steypu sem væri þar þá væri réttast að gera það sem myndin sýnir ;) Þessi ágætis vefsíða sem gerir þetta kleyft hefur slóðina http://www.netdisaster.com/
hérna er notað Led Zeppelin effect og tónlist með The land of Ice and snow

Skítaveður

2007-12-30T13:09:00.000Z

Það liggur við að maður leggist í þunglyndi við það að líta út. Komið langt fram yfir hádegi, en samt ekkert nema myrkur og drungi yfir. Má ég þá heldur biðja um snjóinn.

Eftir veisluhöld

2007-12-29T20:59:00.000Z

Veislan í gær var meiriháttar. Allt var þetta á siðsamlegu nótunum. Við sátum hér og spjölluðum fram eftir kvöldi. Það er nú samt þannig með suma að þeir þurfa alltaf að stjórna og vorum við plötuð til að taka þátt í samkvæmisleik og alles. Takk öll fyrir góða skemmtun.

Gleðileg jól

2007-12-25T15:46:00.000Z

Gleðileg jól öll sömul. Jólahátíðin byrjar vel þetta árið. Hreindýrasteikin á aðfangadagskvöld var hreint frábær.
Ég hef verið að hugsa já ég hef stundum tíma til þess en ég hef algjörlega vanrækt þetta blogg. Kannski vegna þess að það var á sínum tíma sett upp þegar ég átti við ákveðin veikindi að stríða og var notað til þess að flytja fréttir af ástandi mínu hverju sinni. Hef ég kannski bara ekki frá neinu að segja? Ekkert til að miðla til vina og ættingja? Kannski er það einfaldlega svo og þó nei ég held að þetta sé einfaldlega leti. Já, ég veit ég er latur að eðlisfari.
Það sem af er vetri hefur verið mjög annasamur tími hjá mér. Mikið að gera í vinnu og síðan hitt að ég gegni nú starfi forseta Kiwanisklúbbsins Geysis hér í Mosfellsbæ. Ef rækja á það starf vel þá er það þónokkurt verkefni. Þetta er kannski ástæðan fyrir því að lítið hefur verið skrifað hér síðustu vikur og mánuði. Snúum okkur að öðrum hlutum.
Næstkomandi föstudag verður verður slegið hér upp heljarinnar afmælisveislu, nei ég á ekki afmæli en veislan verður engu síður haldinn hér hjá mér. Þar munum við systkynin og allt okkar hyski hittast í fyrsta skipti í um það bil ár. Það verður ábyggilega hin skemmtilegasta samkoma.
ps. myndin sem fylgir var tekin á jólum í fyrra hér útum útidyrnar hjá okkur Siggu.

Grasekkilsstand

2007-09-25T15:05:00.000Z

Það verður að segjast eins og er að ég hef verið óttalega latur við að blogga nokkurn skapaðan hlut uppá síðkastið. Tilgangurinn með þessari síðu var að segja fréttir af mér og mínum og þegar lítið nýtt er að frétta er lítið bloggað. Þetta gefur náttúrulega augaleið. Ég hef verið grasekkill síðan 13. þessa mánaðar en Sigga er á Heilsuhæli NLFÍ nei það heitir víst Heilsustofnun nú til dags. Þær mægðurnar munu dvelja í Hveragerði í mánuð.
Túrinn okkar til Dannenberg á dögunum gekk vel og verður ferðasagan birt seinna ég hef bara haft nóg annað að gera en að taka hana saman. Reyndar bauð ég ferðafélögunum heim núna á dögunum og vorum við búinn að safna saman myndum á einn DVD disk sem ég sýndi við það tækifæri.
Framundan er 15 ára afmæli Halaleikhópsins og mun það verða heljarveisla, en ég hef ákveðið að taka ekki þátt í starfi leikhópsins í vetur sökum annara starfa, sem ég hef tekið að mér.
Ekki ætla ég að lofa neinu um það hvort bloggum fari að fjölga það ræðst einfaldlega af því hvort eitthvað verði að frétta af mér og mínum.

Bara að drepa tímann

2007-07-20T16:43:00.001Z

Hvað gerir maður þegar ekkert er annað að gera en að bíða eftir að ákveðið verk fari í gang. Jú maður stelst til að blogga. Bara svona til að drepa tímann.
Það er svosem ekkert merkilegt að frétta, það fer að styttast í fríið. Ætla bara að vona að það fari að stytta upp á væntanlegum áfangastað. Meðan sólin hefur leikið við okkur þá hefur rignt full mikið á meginlandi Evrópu.
Ætti maður að nenna að skella sér uppí Krika á eftir? Það er orðið nokkuð síðan ég hef kíkt þangað en ég má eiginlega til því hún Stína útbýr ábyggilega "Akureyring" handa mér ef ég kem.
Læt hérna fylgja með eina mynd svona til tilbreytingar en hún var tekin á smá túr um Mosó um síðustu helgi sem við félagarnir skuppum í.

Allt í föstum skorðum

2007-06-20T13:08:00.000Z

Síðan hér var eitthvað skrifað síðast hefur fátt merkilegt gerst. Tilveran er nokkuð í föstum skorðum. Um síðustu helgi skruppum við Sigga í Krikan og áttum þar notalega stund með fleirum Sjálfsbjargarfélögum. Staðurinn hafði verið opnaður formlega helgina áður sem reyndar er óvenju seint. Ég geri fastlega ráð fyrir því að vera þar eitthvað um næstu helgi líka.
Nú er maður byrjaður að skjóta á fullu utanhúss svo maður verði sér ekki til skammar í Þýskalandstúrnum sem fyrirhugað er að fara þann 17. ágúst n.k. ekki dugar að koma heim með öngulinn í rassinum.

Út að viðra sig

2007-06-08T21:38:00.000Z

Það er svo sem ekkert nýtt að frétta héðan frá okkur. Veðrið er orðið þess virði að fara út og við dustuðum rykið af skutlunum í gær í fyrsta skipti þetta árið. Ekki var farið mjög langt að þessu sinni heldur var frekar verið að kanna hvort þær væru ekki í lagi.
Ég var að vafra á netinu áðan og rakst þá á norska síðu sem heitir "Engar hindranir" hvet alla til að skoða en þarna eru aðgengismál skoðuð út frá ýmsum sjónarhornum. Það væri óskandi að hið nýja Félags og tryggingamálaráðuneyti okkar Íslendinga færi útí svona átak eins og norsararnir.

Hvítasunnuhelgin

2007-05-29T15:45:00.000Z

Við vorum í sumarbústaðnum um helgina og lágum þar í leti. Fórum reyndar ekki fyrr en á laugardag og vorum komin heim um miðjan dag á mánudag.

Sumarrútínan að hefjast

2007-05-18T16:43:00.000Z

Í gær var legið í leti heima fram eftir degi en Magga systir kíkti ásamt mömmu í heimsókn til okkar og var orðið nokkuð síðan ég hafði séð þá gömlu. Ég hafði heyrt í henni í síma en ekki séð nokkuð lengi.
Nú er sumarrútínan að hefjast hjá mér en hefðbundu félagsstarfi að ljúka. Vonandi getur maður getur snúið sér að öðru í sumar. Nóg verður að gera næsta vetur.
Við vorum með aðalfund hjá okkur í Kiwanisklúbbnum Geysi sl. miðvikudagskvöld og fór það vel fram en það kom í minn hlut að stjórna þeim fundi. Um næstu helgi er svo aðalfundur Halaleikhópsins og þar þarf ég að vera líka. Þá er þetta félagsstúss væntanlega búið í bili.
Ég er búinn að vera með allsskonar hugmyndir um að hefja heilsuátak á sjálfum mér fara að hreifa mig meira eða þannig. Það ætlar samt ekki að ganga andskotalaust að framkvæma það því alltaf skal eitthvað koma úppá sem þarf að sinna og eyðileggur göngutúrana fyrir mér. Kannski er ég bara svona latur og nota það sem afsökun fyrir því að gera ekkert í málinu.

Skrapp austur

2007-05-14T15:21:00.000Z

Ég skrapp austur á Egilsstaði um helgina og átti þar notalega stund með systur og mági. Þar ræddum við hin ýmsustu mál, en fyrst og fremst var þetta svona afslöppunarferð fyrir mig. Hafði með mér myndavél en ekki varð nú afraksturinn af því neitt sérlega góður ætla þó að reita inn nokkrum myndum á myndasíðuna mína næstu daga. Tvær eða þrjár eru nú þegar komnar.

Ekki get ég nú sagt að ég sé ánægður með kosningaúrslitin og verður fróðlegt að fylgjast með hvað gerist næstu daga. Ætli það gerist aftur það sama og gerðist 1995? þegar Davíð kippti Dóra inn í stað Jóns Baldvins. Ef ég á að segja eins og er þá finnst mér kosningakerfið hér orðið stórskrýtið svo ekki sé meira sagt. Það er ekki nokkur leið að fá nokkra glóru í þetta orðið.

Ekki dauður enn

2007-05-07T15:21:00.000Z

Nú verður maður að fara að bretta upp ermarnar og skrifa eitthvað, svona andsk.... ládeiða gengur ekki lengur.
Það mætti halda að maður væri dauður eða þannig. Fréttir af andláti mínu eru allavega stórlega ýktar og ég og mínir lifum góðu lífi. Ég hef bara einfaldlega ekki gefið mér einn einasta tíma til að blogga undanfarinn mánuð.
Þetta er búinn að vera náðug helgi hjá okkur og er það töluverð breyting frá atinu sem var helgarnar þar á undan. Leiksýningum er lokið og lífið óðum að færast í eðlilegt horf. Við vorum með brot úr verkinu á sýningu "List án landamæra" þann 30. apríl sl. og lukkaðist það nokkuð vel. Við hjónakornin skruppum í bíltúr í gær sem svosem er ekki í frásögur færandi en mikið er nú allt óttalega litlaust ennþá sbr. myndina sem hér fylgir en hún var reyndar tekin fyrir hálfum mánuði.

Stefnan tekin á að gera ekki neitt

2007-04-03T15:28:00.000Z

Núna um páskana hefur stefnan verið tekin á það að liggja í leti helst með tærnar uppí loft ;)

Hægt gekk það

2007-03-27T10:42:00.000Z

Á þessum tæpum tveimur árum síðan við fluttum í Mosó þá hef ég aldrei verið jafn lengi í vinnuna og í morgun. Það tók u.þ.b. klukkutíma, lagði á stað 08:15 en var komin á áfangastað kl. 09:17. Hálkan var þvílík á Vesturlandsveginum að það hálfa væri nóg. Meðalhraði bíla var vel undir 20 km/klst. Held að ég hefði verið fljótari að ganga. Svona gekk þetta alveg niður undir Ártúnsbrekku. Þegar þangað var komið var allt orðið eðlilegt.

Ekkert til að hrópa húrra yfir

2007-03-26T11:06:00.000Z

Fjári er nú orðið langt síðan ég hef skrifað nokkuð hér inn. Það helgast af því að ég hef haft svo mikið að gera að bloggið situr á hakanum.
Leiksýningar ganga nokkuð vel og er ekkert yfir því að kvarta. Núna um helgina fór fram Íslandsmót ÍF í bogfimi og var ég að sjálfsögðu með. Ekki var nú árangurinn til að hrópa húrra yfir maður verður bara að gera betur næst.
Altaf er það ákveðinn léttir þegar framtalsgerðin er yfirstaðin og verð ég að segja eins og er að nú þurfti ég nánast ekkert að vesenast í kringum það. Allt var á sínum stað nema að ég þurfti að handfæra eina tölu. Hugsa sér munin frá því áður. Það er samt ótrúlegur fjöldi fólks sem ekki þorir að gera þetta uppá eigin spýtur og þekki ég sjálfur dæmi þess.

Frumsýning að baki

2007-02-26T10:30:00.000Z

Þá er frumsýning að baki og hægt að fara taka lífinu með aðeins meiri ró. Frumsýningin á leikritinu Batnandi maður sl. laugardagskvöld gekk mjög vel. Það hefur varla verið hægt að hugsa um neitt annað sl. tvo mánuði. Nú þarf maður að fara að setja fljótlega í annan gír og fara að huga að því sem hefur verið trassað á meðan.
Hvet alla til að sjá sýninguna en næsta sýning verður laugardaginn 3. mars kl. 20:30

Generalprufa

2007-02-23T14:16:00.000Z

Jæja, þá er komið að því - Generalprufa í kvöld nú er bara að krossleggja fingur og vona það besta. Greini kannski frá því í kvöld hvernig gekk.

Lokaspretturinn

2007-02-12T23:02:00.000Z

Jæja, þá er lokaspretturinn í æfingum á Batnandi maður að hefjast og nú er aðeins tæpur hálfur mánuður í frumsýningu. Ég verð sem sagt ekki viðræðuhæfur næsta hálfa mánuðinn eða svo. Annars er allt gott að frétta héðan frá okkur.

Af rannsóknum og fleiru

2007-01-31T12:12:00.000Z

Það liggur við að það sé orðið viðburður að maður setji nokkurn skapaðan hlut hér inn nú orðið. Það er af sem áður var þegar skrifað var á hverjum degi. Nóg af þessu.
Ég var að koma frá því að sækja Siggu af Borgarspítalanum , úbs nei Landsspítalanum í Fossvogi heitir það víst í dag. Hún er búinn að vera undanfarnar tvær nætur í svefnrannsóknum þar. Í nótt eigum við svo að framkvæma súrefnismælingu heima og kemur þá í ljós hvort hún þarf að hafa súrefni einnig til viðbótar við öndunarvélarnar. Alla vega vona ég ekki því það getur verið andsk... hávaði í þessu þegar súrefnið er komið til viðbótar.
Annars er allt gott að frétta, ég á fullu í æfingum á nýju leikverki og gengur það vel. Væntanlega verður frumsýnt þann 24. febrúar sem þýðir afturá móti að ég missi af árshátíð TR. Það þykir mér fúlt en svona er þetta bara.

Grasekkils standi að ljúka

2007-01-15T11:18:00.000Z

Nú fer grasekkilsstandinu á mér að ljúka. Sigga var að hefja síðustu viku dvalar sinnar á Reykjalundi. Hún var reyndar lengur heima að þessu sinni en áður. Ég skutlaði henni þangað í morgun áður en ég fór í vinnuna. Hún ætlaði nú varla að nenna að fara - finnst þetta allt saman hundleiðinlegt. Ég ætla nú bara að vona fyrir hennar hönd að eitthvað gagn hafi verið að þessu öllu saman.
Það er allt komið á fullt í æfingum á nýju leikriti hjá Halaleikhópnum og ég með hlutverk reyndar ekkert rosalega stórt en fínt hlutverk samt. Það er semsagt nóg að gera þessa dagana.

Nýtt ár og hvað svo?

2007-01-05T18:08:00.000Z

Þá eru jólin að verða búinn og lífið að færast í eðlilegt horf. Frá því að hér var skrifað síðast hefur svo sem fátt markvert gerst. Jólin voru fín og áramót sömuleiðis.
Strax 2. janúar fór Sigga uppá Reykjalund en hún er þar til skoðunar og í þjálfun. Upphaflega átti hún að vera í tvær vikur en væntanlega verða þær þrjár. Þannig að fimm daga vikunnar er ég í grasekkilsstandi en hún kemur bara heim um helgar. Ég er búinn að hafa það fínt á meðan (engin til að nöldra í mér eða þannig). Þó verð ég að segja að stundum er þetta svolítið einmanalegt.
Ég er að verða svolítið latur við skriftir, kannski er það bara að svo fátt markvert er að gerast þessa dagana og ég hef enga nennu í að fara að blanda mér í þjóðmálaþrasið. Manni er kannski orðið skít sama enda engar horfur á neinum breytingum eða þannig.
Ég kíkti niður í Hala í gær, en þar var að hefjast samlestur á nýju leikriti eftir Ármann Guðmundsson. Leikritið sem heitir Batnandi maður samdi hann fyrir hópinn í tilefni af 15 ára afmæli Halaleikhópsins. Mér líst fjári vel á og hugsanlega verð ég með er samt ekki búinn að ákveða það endanlega það kemur í ljós um helgina. Meðan ég man - Gleðilegt nýtt ár öll sömul.

ps. breytti uppsetningu á vefnum þannig að nú geta allir sent inn komment án þess að þurfa að vera skráðir ég verð þá bara að vera duglegri við að henda út "rusli".

Afmælisveisla

2006-12-20T23:13:00.000Z

Þegar ég kom heim úr vinnu á föstudagskvöld þá fann ég fyrir slæmsku í hálsi og höfuðverk hafði ég verið með allan daginn. Átti ekki von á öðru en að ég myndi hrista þetta af mér. Daginn eftir fór ég í að setja upp 100 peru seríu hér á svalaganginn til að skreyta fyrir afmælið. Þetta átti greynilega eftir að koma mér í koll.
Afmælisveisla Siggu tókst með eindæmum vel, en ég var kominn með bullandi hita og heiftarlegt kvef, en reyndi þó að setja upp spariandlitið. Hef legið í bælinu síðan svona fór um sjóferð þá. Til hamingju með afmælið Sigga mín.

Mikið að gera

2006-12-16T18:51:00.000Z

Það er orðið ansi langt síðan hér hefur verið skrifað. Desember að verða búinn og ekki orð allan tímann. Það þýðir þó ekki að ekkert hafi gerst. Eiginlega hefur maður verið upptekin í vinnu og þess háttar en þar eru miklar breytingar framundan. Sigga hefur verið á fullu að undirbúa afmæli.

Fjárans fundir

2006-11-28T11:00:00.000Z

Þetta verður nú meiri vikan. Fundir hvert einasta dag. Maður verður greinilega eins og jójó fram og til baka úr sveitinni í bæinn. Ætli maður geti ekki sjálfum sér um kennt engum öðrum. Við skuppum í bíó hjónakornin á laugardagskvöldið en það er hlutur sem við gerum allt of sjaldan. Ég sagði í gríni að ég hefði ekki farið í bíó í 20 ár eða svo. Reyndar eru það töluverðar ýkjur en ég þykist góður ef við förum einu sinni á ári.

Ekkert að gerast og þó

2006-11-23T09:29:00.000Z

Það hefur ósköp fátt á dagana drifið síðan ég skrifaði hér síðast. Það er bara ekkert spennandi að gerast. Kannki er ég að bulla núna og þó ég er að bíða eftir merkilegri upptöku en það er leikritið Sambýlingar sem Leikfélag Húsavíkur sýndi árið 2005. Verkið fékk ég á videospólu en er að láta færa hana yfir á DVD disk. Diskurinn verður tilbúinn eftir helgina og ég hlakka mikið til að sjá verkið.
Í kvöld erum við Sigga að fara að sjá Þjóðarsálina í flutningi Einleikhússins vonandi stendur það undir væntingum.

Óveðursfundur í gær

2006-11-16T12:21:00.000Z

Skrapp á fund í gær hjá Kiwanisklúbbnum Geysi sem er í sjálfu sér ekki í frásögur færandi nema fyrir það að rokið við Kiwanishúsið í Mosó var þvílíkt að það hálfa væri nóg. Ragnar Gunnar var með mér og ég hélt að við kæmumst ekki lifandi út úr bílnum þó var ekki nema 5-6 metrar að dyrunum. En með góðra manna hjálp þá tókst þetta allt saman. Fundurinn var fínn og um hann má lesa á Geysisvefnum.

Upptekin maður

2006-11-14T21:53:00.000Z

Maður er bara hættur að nenna að skrifa eitthvað hér. Síðustu dagana hef ég verið svo upptekin maður. Reyndar fékk ég slæmsku í bakið í fyrri viku og var ekki í vinnu fimmtudag og föstudag. Síðast liðin sunnudag var ég að keppa í árlegu Internetmóti ÍFR og MTV-Dannenberg og gekk bara þokkalega. Úrslit eru ekki alveg tilbúin ennþá en verða það eftir 1 - 2 daga. Hef verið í samskiptum við þá í Dannenberg við að ganga frá þeim [Úrslitunum].
Í dag fór ég uppá Hrafnistu og átti þar fund með yfirhjúkrunarfræðingi deildarinnar sem mamma er á og tengslafulltrúa. Vorum við þarna ég og Magga systir og ræddum við þau ásamt mömmu. Þetta var hinn ánægjulegasti fundur og skýrði ýmislegt. Ég var farinn að hálfskammast mín, en það var orðið svo langt síðan ég hafði séð gömlu, en hafði reyndar heyrt í henni í síma en það er ekki það sama.

Mót prófkjör og fl.

2006-11-04T23:10:00.000Z

Það er orðið nokkuð síðan ég hef skrifað nokkuð hérna. Það er svosem ekki mikið nýtt að frétta, hlutirnir nokkuð þeir sömu dag eftir dag. Þessi helgi er nokkuð ásetin hjá mér en nú stendur yfir Reykjavíkurmótið í bogfimi og ég tók náttúrulega þátt í því ásamt því að undirbúa og skipuleggja það ásamt fleirum góðum mönnum. Mótið er hálfnað klárast (sunnudag). Niðurstaðan verður að sjálfssögðu birt á bogfimivefnum.
Ég kaus í prófkjöri í fyrsta skipti í dag, en gemsin minn hefur varla þagað fyrir prófkjörskvabbi. Aðallega hafa þetta verið SMS boð. Sagði við einhverja á kjörstað í dag að nú þyrfti maður að geta stillt símann á auto replay. "Búinn að kjósa hættið að bögga mig", en það er víst ekki hægt því miður. Mér sýnist á öllu að minn maður hafi ekki haft árangur sem erfiði. Bömmer!!!

Enn að nördast.

2006-10-25T23:16:00.000Z

Áfram held ég að nördast, nú er lokið uppsetningu vefsíðu fyrir Sjálfsbjörg á höfuðborgarsvæðinu. Ég verð að segjast eins og er að það tók ekki langan tíma eftir að verkið komst af stað. Ég er að nota Typo3 vefumsjónarkerfi í síðuna og er smátt og smátt að læra betur á það. Held að mér eigi bara eftir að líka það vel eftir því sem ég nota það meira. Annars er nú alltaf skemmtilegast að skrifa beint í kóða í venjulegum textaritli eða þannig, það er svo andsk.... krefjandi. Verst hvað maður er orðinn latur við það.
Verð meira og minna á námskeiði næstu tvo daga í sambandi við vinnuna og er það bara ágætis tilbreyting. Annars er allt við það sama.

Ég er nörd

2006-10-21T21:34:00.000Z

Ég held að ég sé að komast á þá skoðun að ég sé algjört nörd. Hvað er ég svo sem að gera mér til dundurs eftir vinnu. And... hafi það að ég nenni að glápa á sjónvarpið. Nei, þeim andskota nenni ég ekki enda segir Sigga "þú nennir aldrei orðið að horfa á sjónvarpið með mér". Eins og hún geti það ekki hjálparlaust.
Ég hef verið að vinna að tveim vefsíðum samtímis núna undanfarið, önnur fyrir Kiwanisklúbbin Geysi en hin er fyrir Sjálfsbjörg félag fatlaðra á höfuðborgarsvæðinu. Síðan fyrir Kiwanisklúbbin hér í sveitinni er búin en hin er að klárast. Ég er semsagt algjört Nörd.
Ég ætla að bæta við einni krækju hér á síðuna en það eru myndir sem ég tók í Kína árið 1977. Í fyrra vetur á skannaði ég þær allar inn og á ég nú afrit af þeim á geisladiski en þetta var allt á 35mm slides filmu. Myndirnar hafa bara geymst nokkuð vel. Mig minnir að sumir séu búnir að bíða eftir að sjá þær í tæp 30 ár eða þannig.

Bévað útstáelsi á karlinum

2006-10-16T00:56:00.000Z

Í gær - nei fyrradag þetta er jú skrifað kl. 00:49 þá vorum við hjónakornin á Haustfangaði Sjálfsbjargar og ÍFR. Samkoman sú tókst ágætlega og ég meira að segja var bláedrú. Þið ráðið hvort þið trúið því en þetta er nú dagsatt.
Meira af útstáelsi því á föstudags eftirmiðdag og fram á kvöld reyndar var ég að skemmta mér með vinnufélögum en haldið var í hestaferð og eða gönguferð. Ég hafði nú aldeilis ætlað að fara á bak en það verður víst að segjast eins og er að ég koksaði á því. Helv... eymingi.
Í gær (sunnudag) þá hélt bogfiminefnd ÍFR fund erum að byrja að plana ferð til Þýskalands næsta sumar að heimsækja góðvini okkar í Dannenberg. Þetta er nú allt á algjöru byrjunarstigi ennþá.
Ég lét nú loksins verða af því að reka endahnútinn á vefinn minn þ.e.a.s. Íslenska bogfimivefinn færði hann á nýjan stað og hefur hann nú fengið vefslóð við hæfi www.bogfimi.net sem er náttúrulega mun betri en var áður. Held ég hafi gert góðan "díl" þar.

Félagsmálastarfið á fullu

2006-10-09T12:06:00.000Z

Það hefur verið nóg að gera þessa helgi. Laugardagskvöldið voru stjórnarskipti í Kiwanisklúbbnum Geysi, það varð hin besta skemmtan. Á sunnudag hélt svo bogfiminefnd ÍFR sinn aðalfund. Það var semsagt nóg að gera í félagsmálunum þessa helgina.
Við hjónakornin vorum reyndar boðin í "brunch" á sunnudagsmorgunin til góðra vina og hafi þau þökk fyrir.
Annars er allt við það sama gamla góða rútínan þið vitið

Fór í allt annað en ætlunin var

2006-10-02T12:27:00.000Z

Nýliðin helgi fór einhvernveginn í allt annað en ég hafði ætlað mér. Það er bara svona þegar maður sest niður og ætlar aðeins að fikta þá get ég ekki hætt. Það sem ég var að fikta við er reyndar vefur sem ég setti upp fyrir fjöldamörgum árum og ég af stórmennsku kallaði "Íslenska bogfimivefinn". Nú er hann semsagt kominn í nýjan búning en er reyndar ekki fullkláraður ennþá. "Oggu pínulítið eftir" Sagan á bak við þennan vef er svolítið skemmtileg, en þannig var að fyrir margt löngu var ég á námskeiði í vefsíðugerð og átti að skrifa vef um eitthvað. "Eitthvað?" "já eitthvað" var svarið. Þessi vefur varð síðan afraksturinn þetta var það eina sem mér datt í hug. Þá vitið þið það.
Ég er nú samt feginn að þetta er búið í bili þó að ég hafi ætlað að gera allt annað þessa helgi.

Lítið að gerast

2006-09-26T12:57:00.000Z

Það mætti halda að maður væri "dauður" ekkert verið skrifað hér í langan tíma. Málið er bara það að það er eiginlega ekkert í frásögur færandi. Hver dagurinn er öðrum líkur. Ég er að skoða núna nýtt vefverkefni sem ég segi frá síðar eftir því sem því vindur fram. Það er nú eiginlega það helsta sem ég er að snúast í núna fyrir utan náttúrulega vinnuna.
Læt hérna fylgja með eina mynd sem ég var að vinna núna á dögunum.

Tónleikarnir og land sem er að hverfa

2006-09-11T09:40:00.000Z

Tónleikarnir hjá Herði á föstudagskvöldið voru stórgóðir eins og við var að búast. Þessi helgi hefur verið róleg Sigga búin að vera veik með kvef og hita. Það er einhver ansans lumbra í mér og Sigga liggur enn.
Mig langaði til að benda á þessa síðu en þar er að finna stórgóðar myndir teknar fyrir austan, af því svæði sem er að hverfa undir Hálslón. Það er víst síðasti séns að skoða þetta landssvæði.

Fastir liðir eins og venjulega

2006-09-07T10:20:00.000Z

Við höfum tekið því mest rólega eftir að fríinu lauk. Ég byrjaði að vinna strax um mánaðarmótin og þar er allt í föstum skorðun. Hinsvegar eru haustverkin alltaf eins félagsmálastarfsemi á fullu og nóg að gera.
Við ætlum hjónakornin að fara á tónleika Harðar Torfa annað kvöld í Borgarleikhúsinu og á ég ekki von á öðrun en það verði upplifun.

Vesturferðin

2006-08-21T17:47:00.000Z

Þá erum við kominn heim úr ferðinni vestur á firði. Hélt smá dagbók sem ég læt fylgja.

Dagur 1
Lagt var á stað frá Mosfellsbæ upp úr kl. 10:00 og stefnan tekin á Borgarnes. Við erum 5 saman á ferð, ég og Sigga, Dolli og Ninna ásamt Hönnu (móðursystir Siggu). Ninna og Dolli eru saman í bíl en við hin á mínum.
Stoppið í Borgarnesi var stutt og síðan haldið áfram sem leið lá norður eftir. Gert var stutt stopp á Brú og fékk mannskapurinn sér að borða þar af ríkulegu nesti sem þær systur höfðu útbúið. Að loknu áti var haldið áfram norður með vestanverðum Hrútafirði. Farin var sem leið lá í Bitrufjörð og þaðan í Kollafjörð sem ég varð varla var við. Komið var til Hólmavíkur um 15:30. Reyndar þurftum við að stoppa á leiðinni á Litla-Fjarðarhorni til að gefa þeim kellum kost á að “pissa”. Það var húsráðendum þar alveg að meinalausu en þetta reyndist vera sumarbústaðurinn þeirra annað hvort þeirra var ættað frá bænum.
Gistiheimilið sem við erum á er í húsi þar sem allt virðist vera frá því snemma á 6. áratugnum ef ekki eldra. Þær sögðu eftir skoðunarferð að þorpið væri í niðurníðslu.

Dagur 2
Við Sigga komum okkur á fætur um núleitið og vorum fyrst. Dundaði ég mig við að laga kaffi fyrir mannskapinn á meðan ég beið eftir því að þau kæmu á fætur. Siggu tókst að koma þeim á fætur hálftíma síðar. Við lögðum af stað um 10:30 og héldum sem leið lá norður eftir. Förinni var fyrst heitið að Drangsnesi. Ekki gerðum við langt stopp þar en héldum áfram fyrir nesið sem leið lá. Veðrið hélst skapleg enn. Héldum við nú áfram norður eftir og var næsti áfangastaður Djúpavík. Eitt skemmdi mikið fyrir okkur en það var veðrið, en eftir því sem norðar dró þá jókst rigningin. Héldum við sem leið lá norður eftir með litlu stoppi í lítilli vík til að skoða rekavið sem þar lá í hrúgum. Loksins komumst við þó til Djúpavíkur og fengum okkur kaffi þar á hótelinu. Eftir stopp þar héldum við áfram í átt að Gjögri. Það var þó í mínum huga tóm tjara eins og veðrið var því nú rigndi svo mikið að ekkerst sást og það var ekkert annað en auka keyrsla. Hanna skaust í hús þarna á Gjögri og keypti hákarl og harðfisk. Héldum síðan heim á leið í sudda rigningu og komum heim um kl. 18:00.

Dagur 3
Héldum af stað frá Hólmavík upp úr kl. 10:00 og var förinni heitið yfir Steingrímsfjarðarheiði og í Djúpið. Heiðin er ekki nema 21 km og var tillölulega fljótfarinn. Þegar niður hana var komið var ákveðið að fara útí Kaldalón. Héldum þangað sem leið lá og sáum við ekki eftir því veðrið lék við okkur allan tímann. Í Kaldalóni dvöldum við drjúga stund áður en haldið var áfram inn Djúpið aftur og út sunnanvert. Héldum nú inn og út firði hvern á fætur öðrum Ísafjörð, Mjóafjörð, Skötufjörð, Hestfjörð, Seyðisfjörð og komum að lokum í Álftafjörð.
Þegar til Súðavíkur var komið þá var drifið í því að taka dót úr bílunum. Við Dolli fórum síðan í það að þvo þá og tók það okkur drjúga stund. Það var þvílík leirdrulla á þeim og mjög erfitt að ná henni af.
Kvöldinu var síðan eytt í að horfa á leikinn og spila Uno.

Dagur 4
Þennan daginn höfum við verið á flakki, byrjað var á því að fara til Ísafjarðar en mannskapurinn þurfti að komast í sturtu og ákveðið að fara í sundhöllina á Ísafirði. Það tók okkur smá tíma að finna hana og enn lengri tíma að komast að henni. Það tókst nú samt að lokum. Þau skelltu sér í sturtu en ég ekki þar sem ég var búinn að því. Á meðan þau tóku baðið þá skrapp ég í myndatökuleiðangur niður á höfn. Að loknu þessu öllu þá var haldið til Bolungarvíkur.
Í Ósvor var okkur ráðlagt að fara uppá Bolafjall og ákváðum við Dolli að fara þangað upp. Nú við héldum inn í “Víkina” og fengum okkur þar af nestinu á tjaldstæðinu þar. Við Dolli héldum svo á Bolafjallið einir og verð ég að segja að það var toppur ferðarinnar. Við hefðum ekki getað fengið betra veður þar uppi. Fyrst við vorum komnir upp á fjallið var ákveðið að skoða Skálavíkina í leiðinni og gerðum við það. Héldum við síðan aftur til Bolungarvíkur þar sem þær biðu okkar. Næst var ferðinni heitið til Suðureyrar við Súgandafjörð og tók það okkur stuttan tíma. Þar var skoðað það helsta og útsýni yfir fjörðin skoðað frá gamla flugvellinum.
Eftir stuttan stans þar var síðan haldið til Flateyrar en þangað hafði okkur verið boðið í kaffi til fólks sem þar bjó. Haldið var sem leið lá þangað. Við Dolli stoppuðum stutt í þessu kaffiboði, en héldum niður á bryggju þar sem hann sýndi mér það helsta þar. Hann hafði verið í fiski þarna fyrir tæpum 30 árum. Þaðan lá svo leiðin útí Klofning en það hafði verið vinsæl gönguleið hjá verbúðafólkinu þarna um árið.
Nú var orðið nokkuð liðið á dag og var því haldið heim á leið og komið heim um kl. 18:10 þetta var búinn að vera góður dagur og frábært veður.

dagur 5
Í dag höfum við tekið því rólega, ég drattaðist ekki á fætur fyrr en undir hádegi. Þar sem veðrið var gott var ákveði að gá til berja og fóru Dolli og Ninna á undan okkur. Dolli kom til baka til að fara í betri skó og sagði okkur hvar þau væru. Ég þóttist náttúrulega vita nákvæmlega hvar það var. Héldum við Sigga síðan á stað skömmu seinna beint á þann stað sem ég hélt þau hefðu farið á. Við leituðum síðan hér um nágrenið en fundum ekkert. Við vorum að því komin að gefast upp þegar ég sá veg upp fyrir þorpið og fórum við hann. Auðvitað voru þau þar uppi í hlíðinni en ég hafði ruglast á grjótnámi og malarnámi beið við malarnámið. Dvöldum við þarna á annan tíma við berjatínslu. Um leið og heim var komið fórum við strákarnir að undirbúa grillið og byrjuðum á kartöflum. Kvennpeningurinn hafði farð útí búð og hringdu þær í okkur og sögðu að Ninna þyrfti að komast strax til læknis en hún hafði orðið fyrir flugnabiti sem hún hefur greinilega ofnæmi fyrir. Dolli dreif sig með þær á Ísafjörð en ég hugsaði um kartöflur á grillinu á meðan. Meðan ég var að hita þær var ég að fikta í myndavélinni minni. Var að lesa mig til og reyna að læra betur á hana, þegar ég ýtti óvart á vitlausan takka og formattaði kortið uppá nýtt. Eyðilagði semsagt allar myndir sem höfðu verið teknar þann daginn. Til allrar hamingju hef ég haft það fyrir sið að setja allar myndir sem ég hef tekið yfir daginn yfir á tölvuna svo það voru 5 eða 6 myndir sem fóru í súginn. Þakka mínu sæla fyrir að hafa haft tölvuna með.

Dagur 6
Í dag var farið tiltölulega seint af stað, en ferðinni var heitið á Ísafjörð. Kvennfólkið vildi fara í búðir. Við skiluðum þeim þangað og ég og Dolli héldum síðan á Breiðdalsheiði. Það er greinlegt að veginum þar er ekkert haldið við því að allur ofaníburður er horfin. Þar sem hann er hæstur hafði hrunið á hann úr skriðu og þurftum við að færa til stein svo við kæmumst alla leið. Ferðin sóttist samt hægt en örugglega og verður að segjast eins og er að “sliddujeppinn” hanns Dolla stóð sig með þrýði. Tókum svo göngin undir heiðina til baka. Þetta var alveg mátulegt ferðalag en þegar við komum út úr göngunum aftur voru þær að fara til baka að bílnum mínum sem ég hafði skilið eftir handa þeim.
Við héldum nú til Súðavíkur aftur en þá uppgötvaðist að aldrei hafði verið komið við í apótekinu eins og til stóð. Ég brunaði því aftur til Ísafjarðar þar sem Hanna skaust inn í apótekið. Þá var loksins hægt að halda heim aftur sem tók mjög stutta stund. Því sem eftir var dagsins var eytt í það að ganga frá.

Dagur 7
Nú var komið að síðasta degi okkar í Súðavík en upphaflega stóð til að vera þar fram á sunnudag. Við ákváðum hinsvegar að breyta ferðaáætlun og taka áfangan heim á tveim dögum. Það reyndist verða skynsamleg ákvörðun. Nú við lögðum á stað undir hádegi til Ísafjarðar og þaðan var stefnan tekin á vestjarðagöngin undir Breiðdalsheiði. farið var sem leið lá til Þingeyrar. Þá var haldið í næsta áfanga en það var Bíldudalur. Þar hafði verið ákveðið að skeppa í heimsókn til skyldfólks sem þar býr. Hanna og Sigga urðu eftir þar en við hin héldum út í Selárdal. Þar skoðuðum við verk Samúels Jónssonar, sem nú er verið að lagfæra og forða frá skemmdum. Fannst mér mikill munur á ástandi þeirra núna heldur en þegar ég kom þarna fyrir u.þ.b. 15 árum.
Eftir stuttan stans þarna í Selárdalnum var haldið til baka á Bíldudal til að sækja þær Hönnu og Siggu. Okkur hafði verið ráðlagt að fara sömu leið til baka en ekki í gegnum Patreksfjörð sem væri u.þ.b. 100 km lengra. Leið okkar lá svo beina leið í Flókalund en þar fengum við okkur að borða. Barðaströndin var síðan ekin sem leið lá í næsta áfanga sem var Djúpidalur í Djúpafirði en þar höfðum við pantað gistingu.

Dagur 8
Þá var ágætis ferð komin á enda, vöknuðum snemma þennan morgunin. Reyndar var ég illa sofinn en held að það hafi bara verið kaffidrykkja kvöldið áður. Við héldum á stað suður rétt fyrir hádegið. Fyrsti áfangastaðurinn var Reykhólar og fórum við út að Stað. Þar er mjög falleg eyjasýn og sést vel yfir. Eftir að hafa dvalið þarna um stund var haldið af stað aftur. Ferðin suður gekk eins og í sögu stoppað í Borgarnesi til að fá sér að borða. Það voru þreyttir en ánægðir ferðalangar sem náðu heim um kaffileitið í Mosó.

Slappað af og notið þess að vera í fríi

2006-08-09T17:02:00.000Z

Mikið er maður nú búinn að taka því rólega eftir að við komum heim af "nesinu". Eiginlega hefur ekkert verið gert að viti. Reyndar skruppum við í skutlutúr hérna upp í dal sl. laugardag og var það að mörgu leiti góður túr. Því miður eru engar myndir til úr túrnum.
Nú erum við að byrja að undirbúa ferðina vestur á firði en þangað er meiningin að halda um næstu helgi. Meira um það síðar.

Á ferð um Snæfellsnes

2006-08-04T22:29:00.000Z

Jæja, þá er maður kominn í sumarfrí. Á þriðjudaginn lögðum við Sigga ásamt Ingibjörgu (systur minni) og Jan (manni hennar) í ferð á Snæfellsnesið en þangað hafði hann aldrei komið. Þetta var svona skyndi hugdetta sem ég fékk um sl. helgi. Það verður að segjast eins og er að ferðin heppnaðist mjög vel. Nesið var farið réttsælis gist á Arnarstapa eina nótt. Enduðum ferðina á því að fara í skoðunarferð um eyjarnar utan við Stykkishólm með Sæferðum.

Allur lurkum lamin

2006-07-30T23:43:00.000Z

Það er búið að vera mikið að gera þessa helgi. Haldinn afmælisveisla fyrir mömmu, sem reyndar á afmæli seinnihluta ágúst mánaðar. En það helgast einfaldlega af því eins og sagði í fyrri færslu að við erum öll á landinu núna systkynin.
Í dag fórum við í göngutúr að skoða Lambafellsklofa. Hvað skyldi það nú vera jú það er lítið fell nálægt Keili sem heitir Lambafell og er klofið þannig að það er hægt að ganga í gegnum það. Fyrir mig var þetta nokkuð strembin ganga en hafðist. Alla vega er ég nú allur lurkum laminn.

Myndavélin á lofti

2006-07-26T23:46:00.000Z

Ég er búinn að vera að mynda óvenju mikið undanfarið. Því hef ég sett kræju hér á síðuna neðst þar eru myndir, sem eru vistaðar á www.flickr.com þangað hef ég verið að henda inn myndum sem ég hef verið að taka á svona græju undanfarið. Þetta safn á eflaust eftir að taka miklum breytingum, því ég hendi væntanlega meirhlutanum út aftur. Það er bara svo andsk.... gaman að fást við þetta og þá sérstaklega eftirvinnslu mynda. Það er eins og maður sé kominn aftur í myrkrakompuna, án myrkursins. Hugsa sér ekkert sull með vökva eða eiturefni allt á stafrænu formi. Ég er rétt að byrja að fikta við þessa vél þó ég sé búinn að taka vel á 900 myndir á hana.
Nú er ég farinn að telja niður dagana þangað til ég kemst í frí, en fyrst ætla ég að njóta samverustunda með systkinum mínum en við verðum öll hér á suðvestur horninu um næstu helgi. Það er orðið langt síðan við höfum hist öll.
Uppúr miðjum ágúst verður svo lagt væntanlega í ferð vestur á firði. Það eiga eflaust eftir að birtast einhverjar myndir þaðan þegar þar að kemur. Meira um það síðar.

Góðviðri - já og nei

2006-07-20T20:10:00.000Z

Það er ekki andskotalaust að þurfa að vera að vinna í þessi fáu skipti sem sólinn lætur sjá sig hérna á suðvestur landinu. Það er nú ekki eins og það sé neinum gríðarlegum hita fyrir að fara. 13° hér í Reykjavík.
Bölvaði mér ógurlega áðan, en ég ætlaði að taka myndavél með mér í morgun og mynda heimsins stærsta seglskip á eftir. Það verður víst að bíða, nenni ekki að keyra 30 km til þess að nálgast vélina.
Stundum held ég að fólk og fjölmiðlar sé orðið stór undarlegt sbr. þetta. Það er greinilegt að við höfum fjarlægst ansi mikið umhverfi okkar síðustu áratugina.
Þegar ég var búinn að vinna um kl. 5 í dag þá skaust ég niðrí Hátún 14 og skaut nokkrar umferðir og tókst bara nokkuð vel til. Var nú einn mest allan tíman en þó kom Guðmundur Þormóðs um 6 leitið. Þetta var ágætis endir á annars góðum degi held ég.

Skutlutúr í góða veðrinu

2006-07-16T22:25:00.000Z

Eftir að ég var búinn að vinna í dag dró ég Siggu og tengdamömmu með mér í smá túr. Fórum á skutlunum hérna með ströndinni. Farið var sem leið lá eftir göngustígunum sem liggja hér með ströndinni. Enduðum niður við ósa Korpu og snérum þar við. Þetta var hreint stór góður túr.

Spilirí og fleira

2006-07-14T21:02:00.000Z

Við SJER félagar komum saman í gær til að spila. Reyndar ekki allir einn vantaði. Það skiptir hins vegar ekki máli en mikið andsk.... vorum við orðnir ryðgaðir. Ég held að það sé orðið hátt í mánuður síðan við spiluðum síðast. Þrátt fyrir það þá var þetta góð æfing.
Það er einhver lumbra í mér þannig að ég hef verið heima í dag. Þetta er ekkert alvarlegt, en mér fannst rétt að vera ekkert að fara í morgun og geta svo ekki einbeitt mér að því sem ég þyrfti að gera.

Af kjaftaskúmum

2006-07-12T10:13:00.000Z

Einhverntíma var sagt að "illt umtal er betra en ekkert", nú á þetta greinilega við um mig. Alla vega fæ ég þær fréttir úr Krika að þar hafi það borið á góma s.l. sunnudag að ég hafi verið "blindfullur í heila viku" uppí Munaðarnesi nú á dögunum. Ja, nú sést best hverjir eru vinir manns og hverjir ekki.
Ég læt mér alla vega svona kjaftasögur í léttu rúmi liggja, sérstaklega þegar þær koma frá einstaklingum sem ekki greina á milli draums og veruleika. Þeir taka það til sín sem eiga.
Annars talandi um Krikan, þá er gaman að sjá að nýja húsið er komið þangað.

Skroppið í bíltúr - öfugur Þingvallahringur

2006-07-09T23:25:00.000Z

Skruppum í góðan bíltúr í gær (laugardag), sem byrjaði reyndar á því að ná í mömmu niðrá Hrafnistu, en hún er ný flutt þangað. Þaðan lá leiðin út úr bænum. Við Sigga höfðum ákveðið að fara með þá gömlu austur fyrir fjall og upphaflega var stefnan tekin á Hveragerði. Á leiðinni ákváðum við samt að fara í kaffi á Hafið bláa, en það er veitingastaður sem er við ósa Ölfusár við brúna að vestanverðu. Þar áttum við notalega stund við kaffihlaðborðið. Við ákváðum að fara síðan lengri leið heim byrjuðum á því að renna upp á Selfoss. Þaðan var svo farið sem leið lá framhjá Þrastarlundi og beygt inn á Þingvalla leiðina. Fórum svo í gegnum Þingvelli, stoppuðum aðeins á nýja tjaldstæðinu í Vatnskoti, skoðuðum þar aðstöðu sem þar er kominn. Þarna við vatnið fékk ég þær bestu fyrirstætur sem ég hef lengi haft til að mynda en það voru 10 litlir andarungar. Þeir voru svo gæfir að það var hreinasta skemmtun að mynda þá. Fórum síðan sem leið lá yfir Mosfellsheiði til Reykjavíkur. Skiluðum það mömmu af okkur og héldum heim. Sú gamla var ánægð með túrinn, og þar með var takmarkinu náð. Svona í lokin allir skoða þetta myndband.

Skroppið í Krika

2006-07-07T21:01:00.000Z

Þegar ég var búinn að vinna í dag þá skruppum við í Krika hjónakornin og áttum þar góða stund með góðu fólki. Annars hefur lítið mekilegt annað skeð þessa vikuna.

Sumarhátíðin

2006-07-03T18:39:00.000Z

Eins og greint var frá í síðustu færslu þá var haldið austur í Reykholt í Biskupstungum á sumarhátíð CP félagsins. Þetta er í fimmta sinn síðan þessi hátíð er haldinn og í þriðja skiptið sem við förum. Hátíðin tókst vel í alla staði og skemmtu fjölmargir þáttakendur sér hið besta.
Það sem krökkunum finnst mest gaman er að fara í ferð með "Kubbnum" hanns Óla eins og myndirnar hér að ofan sýna.
Hátíðin stendur yfir frá föstudegi til sunnudags hverju sinni og er haldið mikið ball á laugardagskvöldinu.

Munaðarnes

2006-07-02T17:31:00.000Z

Ég var víst ekkert búinn að skýra frá því að við yrðum viku í Munaðarnesi, en við fórum þann 23. júní þangað. Hver eru svo þessi við náttúrulega ég og Sigga ásamt Guggu vinkonu okkar en hún hafði fengið hús á leigu þarna.

1. dagur í Munaðarnesi.
Komum hingað um kl. 14 og renndum upp að þjónustumiðstöðinni og tilkynntum komu okkar. Athygli okkar var strax vakin á því að húsið (nr. 7), sem við ættum að vera í væri mjög svo ill aðgengilegt fötluðum, hófst þá upp nokkur rekistefna um hvað væri til ráða. Ekki væri hægt að hringja í þann sem útvegaði húsið vegna sumarleifa. Umsjónarmaður staðarins bað okkur aðeins um að doka og kom svo til baka og sagðist vera með lausn á þessu. Afgreiðslustúlka í þjónustumiðstöðinni hafði fengið næsta hús fyrir neðan og bauðst til að skipta við okkur. Þáðum við það með þökkum. Það kostaði nokkuð bras að koma öllu dótinu inn enda upp brekku, en hefðum við verið í upphaflegu húsi þá hefði það verið vonlaust. Ég sé mig reyna að koma Siggu þangað uppeftir í möl og alles.
Eftir að við höfðum komið okkur þokkalega fyrir þá skellum við okkur í heita pottinn og nutum þess hreint í botn. Kvöldinu var síðan eitt í rólegheitum.

2. dagur í Munaðarnesi
O.M.G! að vera með þessum tveim, það tekur stundum á taugarnar. Þær fjasa hér hvor uppí aðra þannig að ég fæ stundum alveg nóg. “þú ert ekki barnanana bestur” segir Sigga, sem ekki getur hætt að fjasa. “Ég er ekkert að fjasa” “ég má aldrei segja neitt”, sagði Sigga einu sinni enn.
Þessum degi var eitt í leti, skoppið niðrí Borgarnes til að ná í eitt og annað smálegt, þegar komið var heim þá var farið beint í pottinn og legið þar í suðu. Passað var vel uppá að hafa nógan bjór með. Mín þurfti samt að “fjasa” yfir því. Henni var þá bara gefin “Caribbean Twist” í staðin og undi hún glöð við sína flösku góða stund.
Ekki nenntum við á ballið sem átti að vera hér í kvöld, en við spiluðum Scrabble fram á nótt (eiginlega má sega að ég hafi spilað það) ég þurfti að hjálpa þeim svo mikið. Reyndar varð ég lægstur hefði átt að fá samanlögð stig þeirra líka. Eymingja ég.

3. dagur í Munaðarnesi
Þessi dagur var tekin heldur rólega. Við fórum í smá skreppitúr fyrst í Reykholt og svo þaðan í Húsafell. Kvöldinu var síðan eytt í sjónvarpsgláp og farið snemma að sofa eða þannig.

4. dagur í Munaðarnesi
Fjandinn hafi það nú var sofið næstum því í hálfan sólarhring. Dröttuðumst ekki á fætur fyrr en um hádegi. Veðrið var hundleiðinlegt kalt og gekk á með skúrum. Ekkert farið í pottinn, reyndar höfum við ekki getað það vegna veðurs síðan í fyrradag.
Kvöldinu var eytt í að spila Uno.

5. dagur í Munaðarnesi
Þennan dag var þokkalegt veður og nú skildi aldeilis farið í pottinn. Ok., ég sendur út til að athuga með pottinn en þá var hann orðin svo skitugur að það var ekki hægt. Hringum við þá í umsjónarmann og kom hann að vörmu spori. Tæmdi pottinn og hreinsaði og sagði að það tæki drjúga stund að renna í hann aftur. Sáum við fram á að komast kannski ekkert í pottin en ákváðum að sjá til. Ekki voru komnir nema nokkrir sentimetrar af vatni í pottinn þegar þær voru komnar ofaní. Heimtuðu drykk og létu svo vatnið smá hækka í. Eftir u.þ.b. 1 og hálfan tíma var orðið nokkuð góð vatnshæð í pottinum og bættist ég þá í hópinn.

6. dagur í Munaðarnesi
Þessi dagur fór í undirbúning fyrir heimferð og svoleiðis og ekkert farið í pottinn, sem náttúrulega var alveg hundfúlt en við því var ekkert að gera.

7. dagur í Munaðarnesi
Lögðum á stað nokkuð snemma heim, eftir að ég var búinn að skúra húsið hátt og lágt. Þið trúið því náttúrulega ekkert, en satt er það nú samt. Stefnan tekin á Mosó, og þaðan síðan beint austur í Reykholt á sumarhátíð CP félagsins, sem alltaf er haldinn fyrstu helgina í júlí.

Leið eins og prestinum í brandaranum

2006-06-22T10:33:00.000Z

Þar kom að því að það kæmi almennilegt veður, í gær þegar ég var búinn að vinna þá ákvað ég í staðin fyrir að fara beint heim að sjá hvort ekki væri einhver að skjóta við Íþróttahús ÍFR. Fyrir þá sem ekki vita, þá er þar lítill völlur notaður fyrir bogfimi utanhúss. Þegar ég svo kem þangað er þar ekki nokkur kjaftur. Ég dreif samt dótið mitt út úr bílnum og byrjaði að skjóta á uppsett mark í 30 metra fjarlægð. Mér gekk svona líka vel, en ég var einn til frásagnar um það og fannst það hálf súrt, leið svona eins og prestinum í brandaranum sem stalst á golfvöllin, í stað þess að hafa messu á sunnudagsmorgni.
Eftir að vera búinn að skjóta u.þ.b. 26 örvum þá var ég farinn að finna til þreytu í fótum, en ég skaut standandi sem ég geri alla jafna ekki. Ég bölvaði í hljóði því að hafa engan stól og gerði ekki ráð fyrir að neinn væri í húsinu. Fór samt og athugaði það, en sá engin merki þess. Nú það var bara að bíta á jaxlinn og halda áfram. Verð ég þá ekki var við einhverja hreyfingu á bak við mig og er þá ekki þar hann "Doddi" framkvæmdastjóri ÍFR, bað ég hann hið snarasta að útvega mér stól samskonar og ég notaði venjulega við það að skjóta innanhúss. Þetta varð til þess að ég gat haldið áfram í klukkutíma í viðbót. Í þann mund sem ég var síðan að fara þá kom einn félaginn og varð hann mjög hissa á því að sjá mig þarna. Já það verður að segjast eins og er að ég er ekki nógu duglegur við þetta, kannski hefur líka veðráttan hamlað.
Það verður farið aftur í dag ef góða veðrið helst ;)

Leiðindar vika

2006-06-13T20:18:00.000Z

Mikið óskaplega var síðasta vika eitthvað óspennandi. Nákvæmlega ekkert að gerast. Ég byrjaði að finna fyrir kvefpest um miðja síðustu viku og hef legið eins og skata síðan á föstudagskvöld. Nú er farið að rofa til og ætti ég því að öllu forfallalausu að komast til vinnu á morgun.
Það fór ekki eins og til stóð að ég færi til vinnu "á morgun" eins og ritað var hér að ofan, mér var skipað að hafa mig hægan það sem eftir var vikunnar til þess að mér slægi ekki niður aftur.

Náðug hvítasunnu helgi

2006-06-06T21:39:00.000Z

Við áttum náðuga daga um hvítasunnuhelgina austur í bústað. Þó var hægt að nýta mann í smá málningarvinnu minna mátti það varla vera. Myndin sem fylgdi síðustu færslu er greinilega kominn nokkuð til ára sinna en ýmislegt hefur breyst frá því að hún var tekin, þó ekki væri nema gróðurinn fyrir austan. Hann hefur tekið stakkaskiptum undanfarin ár.
Nú er grámyglulegur hversdagsleikinn tekin við, ekki er hægt að segja að veðrið sé spennandi. Maður verður bara vona að úr rætist fljótlega.

Stefnt austur um helgina

2006-05-30T09:34:00.000Z

Í gærkvöldi skruppum við hjónakornin ásamt tengdamömmu austur í sumarbústað í alveg dásamlegu veðri. Tilgangur fararinnar var að koma dóti austur og losna við mold sem átti að fara þangað. Við ætlum okkur að dvelja fyrir austan um hvítasunnuhelgina og eiga náðuga daga.

Að loknum kosningum

2006-05-29T12:41:00.000Z

Það hefur verið frekar rólegt hjá okkur síðustu vikuna. Það eina sem lífgaði uppá þetta allt voru náttúrulega kosningarnar. Ég skrapp á eina kosningavöku í sveitinni og var gaman að fylgjast með þegar fyrstu tölur komu loksins, en það var ekki fyrr en uppúr kl. 23:00. Tölunum var tekið fagnandi, og sem betur fer þá breyttist niðurstaðan ekki. Gerði annars stuttan stans þarna nóg til að klára úr einni kollu. Á leiðinni heim heyrði ég mikil fagnaðarlæti frá kosningavöku VG greinilegt að þar voru menn kátir líka.

Það var haft á orði við mig að nú sætum við sveitamennirnir uppi með þrjá kónga en hefðu velt einni drottningu.

Setið á Sjálfsbjargarþingi.

2006-05-20T19:08:00.000Z

Núna í gær og í dag hefur staðið yfir Sjálfsbjargarþing (haldið á tveggja ára fresti) og var ég einn af þingfulltrúum. Þetta þing er merkilegt fyrir þær sakir að það stóð aðeins í tvo daga. Þingin hafa yfirleitt verið í þrjá daga. Með góðum undirbúningi og skipulagningu þá tókst að koma öllu fyrir á tveim dögum. Þingið gekk vel fyrir sig og var gaman að taka þátt í því.

Aðalfundarskrall og fleira

2006-05-15T13:22:00.000Z

Það eru nokkrir dagar síðan við risum uppúr flensunni, og erum bæði hin sprækustu. Lífið er sem sagt komið í fastar skorður aftur. Núna um helgina fagnaði ég með verðandi félögum mínum í Kiwanisklúbbnum Geysi, en þeir héldu sinn aðalfund sl. laugardag. Það varð heljarinnar mikið skrall. Já þið tókuð eftir að ég sagði verðandi félögum, en ég mun formlega ganga í þann klúbb nú í haust. Þetta er löngu ákveðið en ég frestaði þessu um einn vetur. Hlakka til að taka þátt í því öfluga starfi, sem þar á sér stað en starfsvæði klúbbsins er Mosfellsbær.
Sigga var að leika núna um helgina og voru síðustu sýningar á Pókok um helgina. Hún var að segja hér um daginn að þetta yrði í "síðasta skipti sem hún yrði með". Ég held að það verði varla því hún kann ekki að segja nei.

Æi, helv... flensa

2006-05-05T18:21:00.000Z

Þetta verður stutt og laggott núna, en hér liggjum við bæði hjónakornin í flensu. Sigga búin að vera svona í heila viku en ég lagðist í gær.

Til hamingju

2006-05-02T14:34:00.000Z

Það er nú ekki mikið til að blogga útaf þessa dagana. Þeir (dagarnir) eru hverjir öðrum líkir allt í föstum skorðum eins og vanalega. Þó ber þess að geta að "kella" mín er lasin heima þessa stundina held hún hafi fengið "súrefniseitrun" þ.e. hún þoldi ekki útiveruna á okkur nú á dögunum, en þá fórum við smá túr meðfram strandlegjunni heima. Það var eins og venjulega engin myndavél höfð með, en veðrið var alveg stórgott.
Það verður nú að teljast til frétta að eignast nýja frænku (orðin ömmubróðir einu sinni enn), og er öllum hlutaðeigandi óskað til hamingju. Læt fylgja mynd af montnum frænda hjá litlu systur.

Gleðilegt sumar

2006-04-21T11:36:00.000Z

Fyrirsögnin segir allt sem segja þarf, bara svona að láta vita að við erum við hestaheilsu annars er ekkert að frétta þannig lagað séð.

Einn með sjálfum sér

2006-04-12T20:36:00.000Z

Ég er búinn að vera í fríi þessa vikuna og notið þess að slappa af. Sigga er að spá í að fara austur í bústað eða þær mæðgur, og vera þar um páskana. Hins vegar er okkur karlpeningnum í kringum þær ekki boðið með. Við megum koma í mat á páskadag ef við viljum. Ég ætla mér að slappa vel af, hafa aðeins mig um að hugsa meðan þær eru í burtu.
Nóg um það ég er að búa mig undir að fara sem opinber fulltrúi CP félagsins á bingó sem halda á hér á Draumakaffi en allur ágóði þess rennur til félagsins. Svona í tilefni þessa læt ég meðfylgjandi mynd fylgja, en hún var tekin á fræðslufundi félagsins nýverið. Hvort þetta verður langt stopp hjá mér þarna á Draumakaffi sem er hér í Mosó veit ég ekki ennþá það verður bara að koma í ljós.

Tvö mót um helgina

2006-04-10T09:16:00.000Z

Þetta fer nú að verða hálf lélegt, mesta lagi skrifað hér einu sinni í viku. Svona er þetta bara þegar lífið er fallið í fastar skorður og ekkert merkilegt að gerast.
Núna um helgina tók ég samt þátt í tveim bogfimimótum þ.e.a.s. sem keppandi, annað var Íslandsmót ÍSÍ sem haldið var sl. laugardag hitt var svokallað forgjafarmót, en þá fengu allir þátttakendur ákveðna forgjöf sem miðast við frammistöðuna daginn áður en þetta forgjafar mót var haldið í gær. Það verður að segjast eins og er að árangurinn í fyrradag var mun betri heldur en á Íslandsmóti ÍF. Á forgjafarmótinu var ég með 15 í forgjöf og varð ég nokkuð sáttur við útkomuna.
Niðurstaða þess móts verður birt á morgun væntanlega.
Þetta er nú það helsta sem á dagana hefur drifið fyrir utan þetta hefðbundna vinna, éta og sofa.

Leiksýning og flakk um Reykjanesið

2006-04-03T12:04:00.000Z

Þetta er búinn að vera rólegheita vika og þess vegna ekki verið ástæða til að skrifa mikið. Jæja, en hvað um það hefur samt ýmislegt gerst. Við fórum hjónakornin og sáum Pókok í flutningi Halaleikhópsins sl. laugardag. Hvet alla til að sjá þá sýningu hún er alveg þess virði.
Í gær fórum við í nokkuð góðan túr um Reykjanesið. Fyrsti áfangi ferðarinnar var í Voga og litum þar inn hjá gömlum vinnufélaga. Næsti áfangi var Hafnir, en þangað hef ég ekki komið í fjöldamörg ár. Heldur finnst mér það nöturlegt pláss, kannski var það bara árstíminn og allt rykið sem gerði það svona nöturlegt. Þaðan var síðan haldið sem leið liggur í Grindavík. Veðrið var hið fegursta en ansi var hann kaldur samt.
Þar sem hér var um algjöra skyndiákvörðun að ræða þ.e. að fara í þennan bíltúr, þá náttúrulega gleymdist að hafa með sér myndavél og því eru engar myndir til úr túrnum. Ég held að ég fari að geyma vél bara í bílnum eða þannig. Góður túr og fínn endir á góðum degi.

Dagur tvö á Íslandsmóti

2006-03-26T18:13:00.000Z

Eins og ég skrifaði um í gær, þá tók ég þátt í fyrsta skipti í mörg ár í Íslandsmóti ÍF í bogfimi, sem keppandi. Ég hef verið dómari og mótstjóri á þessu móti í fjölda ára. Jæja, ekki var árangurinn til að hrópa húrra fyrir frekar en í gær. Á tímabili var úthaldið alveg að bila, en þá var bara að bíta á jaxlinn og bölva í hljóði. Maður verður víst í þetta skiptið að taka viljann fyrir verkið. Nú þýðir ekkert annað en að bretta upp ermarnar og fara að æfa almennilega og skipulega. Ekki orð um þetta meir, en úrslitin má sjá á Íslenska bogfimivefnum .
Annars bara fínn dagur eða þannig.

Ekki mótstjóri á Íslandsmóti heldur keppandi

2006-03-25T23:22:00.000Z

Ég hugsaði með mér áðan, "hvurn andsk.... er ég að gera" þegar ég var í fyrsta skipti í ein 10 ár keppandi á Íslandsmóti ÍF í bogfimi. Það var allt í skralli hjá mér sigtið á boganum var úr lagi og allt gekk á afturfótunum. Þegar nokkuð var liðið á mótið náði ég að koma sigtinu í lag og þá fór stigatalan strax uppá við. Vonandi verður árangurinn á morgun betri.
Það var nokkuð undarlegt að vera staddur á miðri skotlínunni, en félagar mínir hvöttu mig áfram. Ég var nokkuð hræddur um að ég myndi bila á úthaldinu, en þetta gekk allt eins og í sögu.
Þessi dagur hefur samt verið andsk.. erfiðari en ég fór að vinna snemma í morgun og fór svo beint í keppnina á mótinu og það er ekki góð blanda.
Ísleifur og Jón Heiðar stóðu sig vel sem mótstjórar og skotsjórar, ég er greinilega ekki ómissandi.

Erfið vika

2006-03-23T14:01:00.000Z

Þessi vika er búinn að vera heldur leiðinleg, ég hef verið svoleiðis að drepast í fótum, þannig að ég hef varla getað gengið. Þetta gengur náttúrulega ekki lengur, var í morgun á heilsugæslunni og ræddi þar við lækni. Fór þar fram á að alsherjar rannsókn yrði gerð því þessir andsk.... verkir eru alltaf að ágerast.
Við notuðum síðastliðna helgi til að kynnast nýja bílnum svolítið betur fórum í góðan bíltúr á slóðir sem ég hef ekki farið nokkuð lengi.

Nýji bíllin kominn

2006-03-15T13:01:00.000Z

Jæja, þá er maður kominn á nýja bílinn tveim dögum fyrr en áætlað var. Við fyrstu kynni er ég bara mjög lukkulegur með kaupin. Viðbrigðin núna eru ekki eins mikil og síðast þegar ég fékk gamla bílinn, en þá fór ég af bíl sem var með 1200 cc vél í bíl með 2000 cc vél fyrir utan stærðina á sjálfum bílnum. Mér fannst ég vera eins og "krækiber í helvíti".
Sigga er búin að vera að drepast út af þessu ristil vandamáli sínu, og þetta er að gerast ansi oft núna að hún liggur hreinlega í kvalaköstum heilu og hálfu dagana. Þetta er farið að fara illa með sálartetrið í henni hreint út sagt. Ef við hefðum ekki tengdamömmu við hliðina á okkur veit ég svei mér ekki hvað maður hefði getað gert. Alla vega hefði ég verið meira frá vinnu vegna þessa ástands á kellu minni.

Viðburðarík helgi

2006-03-13T10:07:00.000Z

Þetta er búið að vera viðburðarík helgi, ég þurfti að leysa leikara í Halaleikhópnum af vegna forfalla. Á fimmtudaginn var vorum við félagarnir í SJER að æfa í mestu makindum þegar leikstjóri sýningarinnar hjá Halanum kom að máli við mig og spurði "hvort ég gæti hjálpað sér". "Með hvað" spurði ég. "Leysa hann Örn af en hann veiktist" sagði hann. Eftir smá fortölur samþykkti ég þetta þar sem ég vissi að "rullan" var ekki stór. Mér var síðan dempt á sviðið daginn eftir á generalprufu þar sem ég stóð og bullaði eitthvað að mér fannst, en meiningin var víst nokkuð rétt. Daginn eftir var síðan frumsýning og gekk hún í alla staði vel, og ég held að textinn hjá mér hafi verið nokkuð réttur. Ég ætla að skella mér fljótlega á sýningu og fá að njóta þess að hlæja svolítið en stykkið er mein fyndið.

Nýr bíll á leiðinni

2006-03-08T10:54:00.000Z

Þá erum við hjónakornin búinn að festa kaup á nýjum bíl. Afhending verður fimmtudaginn 16. mars.
Ég bætti við nýrri krækju hér á síðuna en þetta er góð lesning fyrir alla sem vilja kynna sér aðgengismál.

Af bíltíkum og þess háttar dóti

2006-03-03T15:44:00.000Z

Nú er ég að hugsa um að leggjast í bílapælingar. Bílgarmurinn minn er að verða 9 ára gamall og stendur sig bara fjári vel, en það fer að verða tími á að fara að endurnýja. Þá kemur kannski að aðalvandamálinu. Bíll sem hentar mér, hentar kannski ekki kellu minni, hann má til dæmis ekki vera of lágur þá kemst hún ekki út hjálparlaust og ekki má hann vera og hár, því þá kemst ég ekki inní hann. Mig langar í einn svona en kannski það séu óþarfa flottheit. Jeppadellan hefur aldrei verið langt undan, en ég held að ég láti það vera, alltaf verið skynsamur drengur.

Þokkalegur árangur

2006-02-26T16:14:00.000Z

Í gær tók ég þátt í innanfélagsmóti ÍFR í bogfimi og miðað við hversu lítið ég hef æft held ég að árangurinn hafi bara verið nokkuð viðunandi. Þetta er í fyrsta skipti sem ég keppi með Compound boga og var það alveg nýtt fyrir mér. Undirbúningur fyrir Íslandsmót er í fullum gangi en það verður helgina 25 og 26 mars. Hvort ég keppi þar eða verð mótstjóri verður tíminn bara að leiða í ljós. Mig langar óneitanlega að keppa einu sinni fyrst maður er byrjaður að æfa aftur.
Af okkur hér er hins vegar allt gott að frétta Sigga er öll að koma til svo vonandi er þetta stífluvandamál hennar búið í bili.

Veikindastand á okkur

2006-02-22T16:04:00.000Z

Það er búið að vera óttalegt veikindastand á okkur hjónakornunum, Sigga búinn að vera að "drepast" frá því á fimmtudag og er ekki enn orðin góð. Það er þetta sama gamla sem hrjáir hana sem sagt magaverkur. Ég náði mér í ælupest líka en það stóð stutt, hef samt verið heim hjá Siggu henni til halds og trausts þangað til í dag.
Nú er orðið mál að fara koma sér út úr þessu veikindastandi öllusaman, en vonandi nær Sigga sér útúr þessu eins og áður. Hún verður bara að passa sig í mataræði og þ.h.
Ekki er nú frá neinu markverðu öðru að segja, ég nenni ekki að fara að blaðra um heitustu dægurmálin núna og ekki er ég að tapa á fjárfestingum eins og sumir hafa eflaust gert í gær, kannski það sé komið allt í lag núna hef ekki heyrt neinar fréttir enn. Svo mörg voru þau orð.

Á ég að nenna að fara?

2006-02-15T16:33:00.000Z

Þessir dagar núna eru hverjum öðrum líkir og því ekki mikið til að skrifa um. Svo er líka hálfgerð gúrkutíð finnst mér þessa dagana.
Um næstu helgi verðum við hjónakornin á árshátíð TR en við höfum verið frekar löt við að fara á undanförnum árum.
Það er að brjótast um í mér hvort ég á að nenna að standa í því að mæta á félagsfund hjá ónefndum stjórmálaflokki í kvöld - svei mér þá ég held að ég nenni ekki að fara. Hvurslags vitleysa er þetta drengur, þú getur ekki haft áhrif nema þú mætir og hana nú. Þessi síðasta fullyrðing dundi á mér hérna í eina tíð þegar ég sýndi letitilburði eins og núna. Það er vissara að vera samkvæmur sjálfum sér og fara því alltaf hef ég verið að brýna fyrir öðrum að sitja ekki hjá heldur taka þátt. Það er víst eina leiðin til að geta breytt einhverju í þessu samfélagi okkar. (Dj.... er maður góður núna ;-).

Kominn að austan

2006-02-12T19:49:00.000Z

Eins og minnst var á í síðustu færslu þá hef ég verið austur á fjörðum um helgina. Upphaflega stóð til að vera aðeins föstudag og laugardag en þar sem þorrablótið, sem ég ætlaði að vera á á laugardeginum var blásið af þá framlegdi ég dvöl mína fyrir austan. Hvað var ég svo að gera þar? jú smá námskeið fyrir umboðsmenn TR sem haldið var hjá FNA.
Þetta er hefur verið virkilega góð helgi og ég naut þess að vera fyrir austan, í góðum félagsskap systurs og mágs. Því miður gleymdi aulinn ég myndavélinni og missti af skoti ævinnar þar sem sólin var að setjast við Snæfellið.

Latur við að skrifa

2006-02-06T14:46:00.000Z

Mikið hefur maður verið latur við að skrifa undanfarið það er ekki það að ekkert hafi gerst, það hefur bara ekkert merkilegt verið að gerast hjá mér. Ekki nenni ég að fara að tína upp umræðuna um vandræðin sem "danskurinn" er búinn að koma sér í. Þar hefur margt mis gáfulegt komið fram. Undir næstu helgi þarf ég að leggja land undir fót, þarf að skreppa austur á Egilsstaði, vegna vinnunar en fer svo heim aftur daginn eftir. Hefði alveg getað hugsað mér að stoppa aðeins lengur en þarf að vera á Þorrablóti þann 11. Það verður eflaust hin besta skemmtun eins og hingað til.

Í gær þá hittust Vegmóðs félagar heima hjá okkur, en það er einn elsti gönguklúbbur landsins gæti ég trúað - stofnaður 1968. Samanstendur hann af ættingjum konunnar minnar. Þau minntust einhverntíma á að þau hefðu þótt skrýtinn þegar þau byrjuðu á þessu. Við Sigga höfum ekki oft skellt okkur með en gerðum það í rigningunni í gær. Mér varð hugsað til þess að betur hefði nú verið að fresta göngunni um eins og klukkutíma þá hefði maður ekki orðið svona fjári blautur. Það er samt enginn verri þótt hann vökni.

Sjaldséðir hvítir....

2006-01-21T05:27:00.000Z

Fyrir u.þ.b. 6 mánuðum fjárfesti ég í forláta sjónvarpi, sem ég var að láta að setja upp fyrir mig. Beið hér eftir kunningja mínum sem ég keypti það af og ætlaði hann að aðstoða við uppsetningu sem hann og gerði. Meðan við biðum þá var hringt í okkur og var það þá Leifur (bróðir minn), sem var að tilkynna komu sína. Þau komu svo hér um tvö leitið en þetta er í fyrsta skipti sem þau koma hingað. Mamma var með þeim og fannst mér hún bara brött. Þau voru ekki búinn að vera hér lengi þegar kunningi minn (Dóri) kom, og hafði mamma ekki séð hann í ein 30 ár. Sú gamla sagði við hann "andsk..... ertu orðinn gamall Dóri" ekki það að hún væri orðin gömul. Nei öðru nær. Voru þau hérna hjá okkur í góðu yfirlæti fram eftir degi.

Af siðaboðskap og heilsufari

2006-01-13T21:11:00.000Z

Jæja, hvað á maður að bulla um núna, ég hef í sjálfu sér engu við að bæta umræðu síðastliðinar viku um þetta DV mál, sem tröllreið öllum fréttum. Jú, ég viðurkenni það að ég var einn af þessum 32.000 sem skrifaði undir áskorun þess efnis að nú væri komið nóg. Sé samt svolítið eftir því og get að mörgu leiti tekið undir með Merði Árnasyni. Alltaf gott að vera vitur eftirá. Það er búið að berja á DV fyrir að fylgja ekki siðareglum blaðamannafélagsins, þær eru ekki margar sjá hér.
Hins vegar er það af mér að frétta að ég hef verið frá vinnu í heila viku, fór að finna fyrir óþæginum í vinstri ökla í síðustu viku sem keyrði síðan alveg um þverbak sl. sunnudag. Fór til læknis á miðvikudag eftir að ég fór að skána aðeins, og úrskurður hans var "bólgin liðbönd" og bað hann mig um að taka "því rólega næstu 2 - 3 daga", sem ég og hef gert. Annars allt í "gúddí" eins og einn góður maður sem ég þekki segir oft.

Allar gömlu færslurnar komnar

2006-01-08T22:38:00.000Z

Þegar ég byrjaði að blogga hér þ.e. á blogspot.com þá gat ég þess að ég myndi reyna að færa allt bloggið mitt yfir. Þessum áfanga er nú náð og allar færslur frá upphafi aðgengilegar. Ein af ástæðum þess að ég flutti mig hingað var sú að ég gat ekki nálgast gamlar færslur vegna eilífra bilana í gagnagrunni þeirra sem hýstu bloggið og kerfið er meingallað.
Það var ansi gaman að mörgu leiti að sjá þessar gömlu færslur aftur, það rifjaðist svo ótal margt upp fyrir mér við lestur þeirra.
Það er annars skrýtið veðrið hér uppi á klakanum í morgun snjóaði en nú er kominn grenjandi rigning og rok. Þetta fer stundum óttalega í taugarnar á mér eða þannig.

Ég bara varð

2006-01-07T15:00:00.000Z

Stundum koma yfir mann svona augnablik að maður sér eitthvað og verður að taka af því mynd. Þetta kom fyrir mig áðan og var ég svo heppinn að vera með vélina við hendina.

Hér í eina tíð þá var ég alltaf með myndavél í bílnum hjá mér en það er því miður liðin tíð. Hér birtist ein af þessum myndum sem ég tók áðan.
Það er annars svo merkilegt með blessaða Esjuna hvað hún getur verið margbreytileg. Já þetta er hún ef einhverjir skyldu ekki hafa tekið eftir því. Ég hugsa að þær eigi eftir að verða nokkuð margar myndirnar af henni hérna, það er bara svo gaman að taka mynd af henni.
Annars allt gott að frétta og ekki frá neinu markverðu að segja.

Eftir hátíðar - nýtt ár framundan

2006-01-06T12:13:00.000Z

Núna yfir hátíðarnar hefur maður verið ósköp latur við skriftir. Þetta hefur samt verið góður tími, verst að þetta voru algjör atvinnurekandajól.
Nú hef ég losnað undan einni skyldunni en það er að halda úti vef Halaleikhópsins, nú er hann kominn á eigið lén og annar/önnur tekin við honum. Það er samt gaman að hugsa til þess hvernig hann varð til á sínum tíma en þetta var námskeiðsverkefni upphaflega eins og sumir þessara vefja sem ég hef skrifað. Þessi vefur vildi svolítið sitja á hakanum hjá mér sérstaklega þegar maður var sjálfur sem mest að starfa hjá leikhópnum, þá var bara alls engin tími til að sinna honum þ.e. vefnum nóg. Vonandi verður þetta til þess að hópurinn og vefur hanns eflist enn frekar og óska ég þeim velfarnaðar í starfinu en ég ætla ekki að vera með að þessu sinni.
Að lokum vil ég óska öllum gleðilegs árs og þakka fyrir þau liðnu.

Jólin að koma

2005-12-23T17:12:00.000Z

Það er greinilegt að jólin eru að koma, það er ekkert að gerast í bloggheimum annað en menn senda jólakveðjur þvers og kruss. Þetta eru dagarnir þar sem allt er í lægð og ekkert gerist. Ég held að við hérna í "sveitinni" séum búin að öllu og nú er bara að koma öllu á sinn stað.
Skrapp í bæinn áðan með Siggu en hún þurfti að erindast smá og ég notaði tækifærið á leiðinni heim til að kaupa jólagöfina hennar. Þá er sá höfuðverkurinn búinn. Á heimleiðinn var litið til mömmu, en Sigga vildi hitta þær, (mömmu og Ingibjörgu) áður en þær færu austur.
Sigga er farinn að bauka við að skreyta jólatréð, það verður hennar deild. Þetta er reyndar í fyrsta skipti núna í þrjú ár sem við erum með jólatré, það var bara ekki pláss þar sem við vorum áður. Nú er aftur á móti nóg pláss til að hafa tré. Skildi hún nokkuð vera búinn að gleyma þessu þ.e. hvernig á að skreyta jólatréð? Það tókst að skreyta tréð eftir smá bras og hjálp frá mér og það lítur svo ljómandi vel út.
Nú er bara eftir að setja upp sparifésið og vera hlíðinn og góður strákur yfir jólinn.
Veit ekki hvort ég skrifa eitthvað hérna yfir jólin ef ekki þá óska ég öllum sem hafa haft fyrir því að lesa þetta gleðilegra jóla og farsæls komandi árs.

Hvað eru hinir að bulla á blogginu?

2005-12-21T00:36:00.000Z

Núna hefur maður bara legið yfir því sem allir hinir hafa verið að bulla, en datt þó niður á þetta Podcast svona til að koma manni í jólaskapið. Þetta er hin ágætasta syrpa. Merkilegt fyrirbæri þetta, ég hef dottið niður á fantagóða tónlist bara ef maður nennir að Googla svolítið, svo er þetta bara svo fjári gott form. Kannski maður eigi eftir að gera eitthvað svona sjálfur seinna meir. Gaman var að heyra hugleiðingar Salvarar Gissurardóttur um hvaða íslenskt orð ætti að nota yfir þetta fyrirbæri, þó ekki litist mér á hugmyndirnar sem þar komu fram.
Heimsótti mömmu gömlu í dag, hélt að hún væri að fara austur á morgun, en hún fer ekki fyrr en í vikulok. Sigga var hjá henni og hélt henni félagsskap. Annars bara góður dagur.

Að byrja uppá nýtt - eða hvað

2005-12-19T23:25:00.000Z

Ég hef verið að hugsa, hvað ég á eiginlega að gera með þessa síðu mína. Ég er að verða eitthvað svo strand með hana. Ekkert er að gerast sem vert er að segja frá, reyndar var kannski meiningin að láta hér allt flakka. Einhvern veginn hef ég aldrei náð því að byrja á því almennilega.
Maður þarf að byrja á því að punkta hjá sér svona hugdettur. Það er kannski best að byrja og snúa alveg við blaðinu.
Mikið er annars gaman að lesa greinar þar sem menn tapa sér alveg í pólitískum rétttrúnaði, það má ekki segja hlutina svona heldur hinsegin. Undarlegust verður lesningin þegar viðkomandi hefur ekki hundsvit á því málefni sem hann er að skrifa um.
Það sem mest er greinilega skrifað um á blogginu í dag er þetta með prestin og jólasveininn, ég sem hélt að prestum ásamt lögfræðingum væri greitt fyrir að "ljúga".
Annars var ekki alveg meiningin að hætta að skrifa um það sem hér gerðist. Sigga hélt heljarinnar afmælisveislu á laugardaginn og voru held ég um 12 manns þegar mest var, þó var hún bara já best að tala ekki um það, en það verður stórt næst.

Jólaundirbúningur á fullu

2005-12-16T23:29:00.000Z

Átakalaus vika er liðin, reyndar var upphaf hennar frekar rólegt hjá mér þar sem ég lá í flensuskít framan af vikunni.
Ég var að koma af árlegum jólafundi Kiwanisklúbbsins Esju og var hann fjölmennur. Man ég ekki til að mæting hafi verið svona góð í mörg ár. Hvort maginn á mér þolir hangikjötsveislu tvisvar sama daginn verður að koma í ljós, en það var jólamatur í vinnunni í dag. Alla vega er maður ekki illa haldinn.
Hún Sigga mín verður árinu eldri á morgun og er nú að skreyta og snurfusa hér um allt, en það hefur verið venja hjá henni lengi að jólaskreytingarnar flestar skuli vera komnar upp á afmælinu hennar.

Afmælisveisla - gramsað í dóti og fl.

2005-12-11T14:57:00.000Z

Þetta er búinn að vera ósköp notaleg vika. Tíminn líður allt of hratt eins og ég hef áður minnst á. Við hjónakornin fórum í 30 ára afmæli Kiwanisklúbbsins Geysis í gær og var það mikil veisla og fjölmenn. Ég skemmti mér mjög vel og svo held ég að hafi verið um Siggu líka. Einn góður félagi minn dró hana út á dansgólfið og þaðan kom hún alveg lafmóð til baka eftir drjúga stund. Við vorum nú ekki margir Esjufélagarnir þarna en við alla vega skemmtum okkur vel. Hins vegar fór ég að finna til óþæginda þarna um kvöldið, sem skýrðist morgunin eftir en þá var ég kominn með einhvern fjárans flensuskít.
Sigga er búinn að vera hálf eyðilögð sl. viku vegna þess að hún saknaði ýmislegs jóladóts, búinn að vera að leita að því en fann hvergi. Þetta voru t.d. aðventuljós gluggaskreytingar og fl. Við fórum niður í geymslu áðan og nú skildi gera úrslita tilraun til að finna þetta. Viti menn þetta lá næstum því fyrir framan nefið á okkur, ég veit eiginlega ekki hvernig þær hafa leitað um daginn mæðgurnar. Alla vega er allt fundið og kella mín getur hætt að hafa áhyggjur af þessu. Aðventuljósin kominn út í glugga - svona bara assgoti fín.

Tíminn líður allt of fljótt

2005-12-06T18:35:00.000Z

Ja, nú er úr vöndu að ráða. Hvort á ég að fara á æfingu í boganum í kvöld eða á stjórnarfund hjá CP félaginu? Ætli það verði ekki stjórnarfundurinn, ekki það að mér þyki þeir skemmtilegri heldur að hann er aðeins einu sinni í mánuði en æfingarnar eru þrisvar í viku.
Annars er þetta búinn að vera nokkuð drjúgur dagur. Fór áðan með mömmu til læknis þ.e. ég og Magga systir og þar var sú "gamla" skoðuð hátt og lágt. Ekki orð um það meir nema gott.
Mér finnst alveg óþolandi hvað tíminn líður hratt, það verða komnir "páskar" áður en maður veit af. Jú ég veit jólin eru framundan en ég meinti hitt.
Þetta datt bara si svona í kollinn á mér, bara láta vita af því að ég er lifandi ennþá og ekki alveg hættur að bulla hér.

Jólaundirbúningur að hefjast

2005-12-05T09:50:00.000Z

Þetta er búinn að vera rólegheita vika, ekkert sérstakt svona frásagnarvert.
Jólaundirbúningurinn er að fara af stað en við höfum mest tekið því rólega með hann. Það er annars alltaf svolítið spennandi að finna út hvernig skreytingum verður best fyrir komið þegar á nýjan stað er komið. Þetta var ekkert mál þegar við vorum í Breiðholtinu, þá var allt á sínum stað held ég öll 22 árin sem við vorum þar. Nú er líka allt svo miklu stærra og þetta meira mál þannig séð.
Annars hef ég verið frekar latur við að skrifa nokkurn skapaðan hlut hérna undanfarið. Það er eflaust bara það að lífið er allt í svo föstum skorðum.

Tekið á í sportinu

2005-11-29T21:39:00.000Z

Um síðustu helgi tók maður vel á í sportinu æfingar báða dagana. Þeir eru farnir að tala um það félagarnir í boganum hver eigi eiginlega að verða næsti mótstjóri ef ég fer nú að keppa líka? Ekki ætla ég að hafa áhyggjur af því, ég keppi ef mig langar til.
Við settumst aðeins niður nafnarnir í boganum og að hans ráði þá voru græjurnar aðeins "tjúnaðar" til. Það var eins og við mannin mælt að árangurinn lét ekki á sér standa. Nú er ég loksins að verða sáttur við nýju græjuna. Enda eins gott, það lá við að ég fleygði öllu "draslinu" um daginn. Það er alveg ótrúlegt hvað þetta skiptir miklu máli að hafa dótið í lagi.
Annars hefur þetta verið rólegheita vika, tveir fundir framundan á morgun og þar af annar pólitískur (hvar skildi það nú vera?). Já nú á að fara að skipta sér af pólitíkinni hér í sveitinni.